مجتمع الطوائف

انا بصراحه مش مبسوط

زهقان .. ظمقان .. مدايق

النيابه والقضاء ... كادر خاص

الجيش والشرطه ... كادر خاص

الجهاز المركزى ... كادر خاص

المعلمين ... كادر خاص

بتوع النور اللى مولعين العدادات وهاريينا من فواتير الكهرباء واوعوا تصدقوا ان فيه دعم للكهرباء

 برضه .. كادر خاص

اساتذة الجامعات .. اللى بيبيعوا للطلبه الكتاب ليلة الامتحانات واهم حاجه عندهم انهم يبيعوا الكتاب اللى هو السبب فى بيظان التعليم الجامعى .. كادر خاص

شركات البترول ... شرحه

واكم ... واكم ... واكم 

الاطباء عاملين اضراب عشان قال ايه عشان خاطر مصلحة المريض .. يا سلااااام على رأى القذافى .. مريض ايه دا يا جماعه .. قولوها بصراحه عشان ترفعوا مرتباتكم .. احنا فاهمين وعارفين بعض كويس وكتير مننا بيعتوه هدومه وعفش بيته عشان   ...    من حقكم تطالبوا برفع المرتبات زيكم طبعا زى اى شريحه فى المجتمع وكمان باعتبار سنتين زياده دراسه فى كلية الطب بس بلاش تتمحكوا فى المرضى ..... مالوش لازمه الكلام

والمعلمين كمان اضرابات عشان المرتبات .. 

الفنتازيا بقى ان مع دول السواقين وموظفى النقل العام ..

وغيرهم وغيرهم وغيرهم

عشان تعرفوا

لازم الكل يعرف ان ما فيش حد بيشتغل اهم شغلانه فى البلد

مافيش حد هو اهم واحد فى البلد

مافيش وظيفه هى اهم وظيفه فى البلد

كل واحد فى مكانه اهم واحد فى البلد ..

مش ممكن البلد تمشى بس بالاطباء ولا .. بالمعلمين .. ولا بموظفى النقل العام ... ولا .. ولا .. ولا

لازم يكون فى الشارع كناس

لازم بتاع المحليات .. صحيح هو بيظبط جيبه لكن المفروض انه ضرورى وهو فعلا ضرورى

لازم كل العجله الاداريه عشان كله بيمشى كله وكله بيخدم كله والعامل اللى بيرصف الطريق بيخدم الباشا اللى راكب العربيه

ام يا ترى .. لازم يكون الباشا ابن باشا حفيد باشا

ولا .. السيد الاستاذ الدكتور يكون ابن السيد الاستاذ االدكتور حفيد السيد الاستاذ الدكتور

وسعادة المستشار ابن سعادة المستشار حفيد سعادة المستشار 

وكتيييييييييييييييييييييييييييييييييييييررررررررررررر  كتييييييييييييييييييييييييييييييييييييرررررررررررررر

كمان مره ... مافيش حد هو اهم واحد فى البلد ... كلنا فى البلد دى مظلومين .. وكلنا مجنى علينا .. وكلنا شحاتين  وبناخد مرتبات رمزيه .. وكلنا عايزين مرتبات حقيقيه 

وبـــــــــــــــــــس

مبارك فى القفص

وعلاء وجمال فى القفص

حبيب العادلى وشلته فى القفص فى قضية قتل المتظاهرين وحاجات اخرى

زكريا عزمى .. فتحى سرور .. صفوت الشريف فى قضية موقعة الجمل

عقاب ربنا

دهب .. الماظ .. ياقوت .. احمدك يا رب

كلنا شفنا اكتر من الف مصرى بياكل فيهم سمك القرش فى البحر الاحمر لما شبع وجات له تخمه فى البحر الاحمر والريس المخلوع كان فى استاد القاهره بيتفرج على الكوره... حق دول راح فين؟

كلنا عارفين مين اللى قتل خالد سعيد

كلنا عارفين مين اللى عذب وقتل " محمد بلال " بسبب كنيسة القديسين  وعارفين من اللى ولع فى كنيسة القديسين

كلنا عارفين مين اللى خطف وقتل الصحفى رضا هلال

كلنا عارفين مين اللى خطف الصحفى الدكتور عبد الحليم قنديل وسابه فى الصحراء بلبوص

كلنا عارفين مين اللى عذب وذل المصريين فى معتقلات وسجون امن الدوله على مدى 30 عام

كلنا عارفين كل البلاوى دى كانت جايه منين وان السبب هو التغاضى عن جرائم الشرطه والعادلى عشان ننوس عين امه

كل المصريين بيقرقضوا فى صوابعهم على القهاوى وسعادته بيظبطوا له كرسى كبير كبير عليه وكان على ابوه

الاف وملايين الشباب قاعدين قفاهم يقمر عيش على القهاوى وياريت كان فيه عيش و اسم النبى حارسه بيعمل حسابه ان يقعد على اكبر كرسى.. لأ .. اكبر وظيفه فى الدوله

كلنا عارفين مين اللى جاب زحافه وزحف بيها مصر وبالقصابيه جرف مصر كلها .. ومين اللى سرق مصر 

كلنا عارفين حاجات كتيره وبلاوى متلتله.. مسيحه

ولما جات الفرصه خلعناك يا ريس .. ومش آسفين ياريس .. واذا كان فيه حد آسف يدينى نصيبه من الهبره اللى خدها وانا ابقى معاه

لو يا ريس تدفع لى شوية ملايين وانا افتح لك صفحه على الفيس بوك واسميها - انا آسف جدا جدا يا ريس .. حاجه جديده آآآهــه ومش حتدفع من جيبك .. ولا من ايراد العزبه اللى انت ورثتها .. من فلوس الغلابه وبالنسبه لى مش مهم الغلابه .. يسكش يولعوا ولا يروحوا فى اى حته تاخدهم .. المهم يا ريس .. شوية فلوس بالملايين وانا اعمل عجين الفلاحه عشان خاطرك يا ريس .. بلا مصر بلا وجع دماغ .. المهم الملايين تدخل جيبى .. يا حبيبى يا ريس .. ولا يهمك يا ريس

يآآآآآآآ اكبر خازوق خدته مصرآآآآآآآآآآآآآآآآه

انا آسف جدا جدا ياريس ان صبرت عليك 30 سنه وانت بتضحك على وعلى اللى خلفونى ومقعدنى على خابور مغرى بنيله

يمكن تطلع براءه - يمكن بتوع موقعة الجمل يطلعوا براءه .. بس انا شفتك فى القفص يا ريس واتكحلت عينى بنور طلعتك البهيه .. وبصراحه انت اديتنى درس رائع فى التمثيل والمسرح يا ريس

فى الآخر احنا عارفين مين اللى قتل المتظاهرين ومين اللى قتل شباب مصر قبل كدا بالألافات ومين اللى غرق المصريين فى البحر الاحمر

احنا عارفين يا ريس

وربنا عارف يا ريس

انا مش آسف خالص يا ريس

اهلا بيكم فى فشكوول الجديده

السلام عليكم

احبائى واخوانى واخوتى وابنائى

طبعا كلكم عارفين ما آلت اليه فشكوول دوت كوم وكيف انها ضاعت فى البحر وقذفتها الامواج ولم استطيع استردادها مره اخرى

وبعون الله وبمساعدة ... مساعدة اييييهههه  ... بمجهود كامل من العزيز الازهرى وكلكم عارفين اسمه من الفيس بوك وانا مش حـ افتن عليه واقول انه اسمه على اسم ابنى .. كتر خيره ويجزيه الله خير على مجهوده ومساعدته فى اخراج هذه الفشكول الجديده اللى ان شاء الله من هنا وجاى حاتواصل معاكم بيها 

اليوم تحدث احداث عظيمه فى مصر .. وطبعا ما زالت الاحداث في قمتها .. والى ماذا ستنتهى .. نسأل الله العلى العظيم ان يحفظ مصر من كل شر وان يجنبها حقد الحاقدين وشماتة الشامتين

تحياتى للجميع واللى اللقاء