الثلاثاء، 13 سبتمبر، 2011

مبارك فى القفص
وعلاء وجمال فى القفص
حبيب العادلى وشلته فى القفص فى قضية قتل المتظاهرين وحاجات اخرى

زكريا عزمى .. فتحى سرور .. صفوت الشريف فى قضية موقعة الجمل
عقاب ربنا
دهب .. الماظ .. ياقوت .. احمدك يا رب

كلنا شفنا اكتر من الف مصرى بياكل فيهم سمك القرش فى البحر الاحمر لما شبع وجات له تخمه فى البحر الاحمر والريس المخلوع كان فى استاد القاهره بيتفرج على الكوره... حق دول راح فين؟
كلنا عارفين مين اللى قتل خالد سعيد
كلنا عارفين مين اللى عذب وقتل " محمد بلال " بسبب كنيسة القديسين  وعارفين من اللى ولع فى كنيسة القديسين
كلنا عارفين مين اللى خطف وقتل الصحفى رضا هلال
كلنا عارفين مين اللى خطف الصحفى الدكتور عبد الحليم قنديل وسابه فى الصحراء بلبوص
كلنا عارفين مين اللى عذب وذل المصريين فى معتقلات وسجون امن الدوله على مدى 30 عام
كلنا عارفين كل البلاوى دى كانت جايه منين وان السبب هو التغاضى عن جرائم الشرطه والعادلى عشان ننوس عين امه

كل المصريين بيقرقضوا فى صوابعهم على القهاوى وسعادته بيظبطوا له كرسى كبير كبير عليه وكان على ابوه

الاف وملايين الشباب قاعدين قفاهم يقمر عيش على القهاوى وياريت كان فيه عيش و اسم النبى حارسه بيعمل حسابه ان يقعد على اكبر كرسى.. لأ .. اكبر وظيفه فى الدوله
كلنا عارفين مين اللى جاب زحافه وزحف بيها مصر وبالقصابيه جرف مصر كلها .. ومين اللى سرق مصر 
كلنا عارفين حاجات كتيره وبلاوى متلتله.. مسيحه
ولما جات الفرصه خلعناك يا ريس .. ومش آسفين ياريس .. واذا كان فيه حد آسف يدينى نصيبه من الهبره اللى خدها وانا ابقى معاه
لو يا ريس تدفع لى شوية ملايين وانا افتح لك صفحه على الفيس بوك واسميها - انا آسف جدا جدا يا ريس .. حاجه جديده آآآهــه ومش حتدفع من جيبك .. ولا من ايراد العزبه اللى انت ورثتها .. من فلوس الغلابه وبالنسبه لى مش مهم الغلابه .. يسكش يولعوا ولا يروحوا فى اى حته تاخدهم .. المهم يا ريس .. شوية فلوس بالملايين وانا اعمل عجين الفلاحه عشان خاطرك يا ريس .. بلا مصر بلا وجع دماغ .. المهم الملايين تدخل جيبى .. يا حبيبى يا ريس .. ولا يهمك يا ريس

يآآآآآآآ اكبر خازوق خدته مصرآآآآآآآآآآآآآآآآه

انا آسف جدا جدا ياريس ان صبرت عليك 30 سنه وانت بتضحك على وعلى اللى خلفونى ومقعدنى على خابور مغرى بنيله

يمكن تطلع براءه - يمكن بتوع موقعة الجمل يطلعوا براءه .. بس انا شفتك فى القفص يا ريس واتكحلت عينى بنور طلعتك البهيه .. وبصراحه انت اديتنى درس رائع فى التمثيل والمسرح يا ريس

فى الآخر احنا عارفين مين اللى قتل المتظاهرين ومين اللى قتل شباب مصر قبل كدا بالألافات ومين اللى غرق المصريين فى البحر الاحمر

احنا عارفين يا ريس
وربنا عارف يا ريس
انا مش آسف خالص يا ريس


هناك 40 تعليقًا:

شمس النهار يقول...

اولا جاية اهني بالمدونة الجديدة

وكمان اعتذر ان تعليق حضرتك وتعليقات اخري جاية انشرها مسحتها

معلش اصلي جديدة في موضوع الاشراف ده
:))

وهرجع تاني اعلق علي البوست نورت بلوجر تاني

Noha Saleh يقول...

انا لما كنت بمشى فى الشارع كنت بلاقى الناس بتكلم نفسها وتدعى عليه

ومرة كنت فى عربية وهو كان ماشى فوق الكوبرى واحنا واقفين تحت مستنيينه يعدى
برضه الناس فى العربية فضلت تدعى عليه

يعنى دى دعوات الغلابة

محمد سعد القويري يقول...

الأستاذ الفاضل :: فشكوول ::
السلام عليكم ورحمة الله
وبركاته

مهما تلون الفساد وتشكل وتلون
فإنه لا يصح إلا الصحيح

أمنياتنا وكل عربي
أن تشرق شمس مصر من جديد على الدنيا كلها ...
وكل ظالم وله يوم

سعدت بتواجدي هنا ،،)
أطيب الأمنيات

مرآتي يقول...

أستاذ فشكوووووووول
إنت بتتكلم مصري بس بلسان حال كل الأحرار .. ربنا ينتقم من ...... والظلام وأولاد الحرام ..
بوست جميل ومعبر ..
إلا إنت لازم تسجل عندي من المتابعين علشان وعد الحر اللي وعدتني إياه إنك تتابع معاي ..
يعني يسرني أشوف صورة حضرتك في المتابعين معاي كلما دخلت لـ "مرآتي"
منورني جداً .. فشكوووووول بيه

Ms Venus يقول...

استاذ فشكوول

عودا حميدا

واسفة للتأخير


قولت اللى جوانا طبعا

بس احنا محتاجين نقول اسفين فعلا

بس اسفين لنفسنا

لاننا سيبنا نفسنا وسيبنا مصر لحد ما نزلت اسفل السافلين كده وبقينا من دول العالم العاشر

حتى الاخلاق نزلت تحت الارض

احنا اللى عملنا فى نفسنا كل ده

ربنا يحلها بقى من عنده

محمد الجرايحى يقول...

الحمدلله .....
ماحدث أشبه بالحلم المستحيل لم يكن أكثر الناس تفاؤلاً يتخيل أن يحدث كل هذا وبهذه السرغة ...لكن ربك لما يريد.

بسمة الورد يقول...

مساؤك هنا وسعاده استاذ فشكووول

اعجبتنى جدا مدونتك وراق لى ما تقدم

تقبل مرورى واعجابى وانضمامى ومتابعتى الاكيده لما تقدم

احترامى ومودتى اخى

وصف الاحساس يقول...

هيييييييييييييه دنيااااااااااا
مادايم الا وجه الله
سبحان الله
يمهل ولا يهمل
بس لو لقيت ال يديك الملايين دي ما تنساناش واحنا معاك في اسفين الجديده

sabry abo-omar يقول...

قالوا يافرعون أيه فرعنك؟؟؟
مساء الفل عليك ومبروك فشكوووول الجديدة .... أتمنى الناس تتعلم من اللى فات بس وربنا يستر على البلد

حسن ارابيسك يقول...

عمنا فشكول
أذيا ياراجل ياطيب
وحشني واللهي ولسة شايف تعليقك طازة الحمد لله القلوب عند بعضها
وكل عام وانت بخير يارب وبصحة جيدة ومنور عالم التدوين

عمنا فشكول
بشأن تلك المقالة الرائعة الساخرة واللاذعة والمبكية على حالنا وسنين كتير راحت من البلد الجميلة دي من غير ماتتقدم وتبقا زي بلاد كتيرة بدأت بعد منها وسبقتنا للأسف
وده طبعا لأسباب كتيرة أنت ذكرت منها الكثير والكثير
وأقولك قول ياعم فشكول قول كمان وسمعهم
قول ياعم فشكول
تحياتي
حسن ارابيسك

نهــــــــــار يقول...

السلام عليكم ...
قال تعالى :( ولا تحسبن الله غافلا عما يعمل الظالمون )
...
أسأل الله ان يكون في عونكم وأن يولي عليكم خياركم
وربنا يحفظ مصر من كل شر
...
في حفظ الله

zizi يقول...

فشكول العزيز ..اولاً باهنيك على المدونة ..ثانياً باشكرك على زيارتي ..ثالثاً انا زعلانة منك عشان مش حاطط اسم مدونتي مع باقي المدونات صحابك هو احنا مش قد المقام ولا نستاهلش محبتك ؟؟؟رابعا: شكلنا كده حانبقىصحاب نظراً لتساوي الرؤية الأفقية في الزاوية الشبه مرئية ..وتحياتي وشكري

جايدا العزيزي يقول...

مش حلوه الشماته دى خالص يا قشكول

هههههههههههههه

ما بلاش طيب ماهو صدام اتعدم ووقفنا نتفرج

وابن لادن اغتالوة وكل اللى عملناه حزنا شويه

قلبك ابيض والمسامح كريم

تحياتى

norahaty يقول...

الف مبروك
استاذنــا على
مدونتك الجديدة
ويعوض عليك ربنا فى
اللى ضاعت معوض مخلف
بأذن الله ويعوض ربنا على
مصر كلها فى فلوسـها
وأرضهااللى فـرطــت
فيهم شلةالحرامية
أياها

بسنت يقول...

انا شايفه ان الثوره بترجع من نقطه بدايه بس جديده
مهما ظهرت المحاكمه والاقفاص
شايفاها تمثيليه

بس فى امل بردوا ان دوله الظلم ساعه
والعدل لقيام الساعه
بس امتى الساعه دى هتخلص دا اللى محيرنى

بنت قلبى يقول...

اخيرا هتجيلى الجرءه انى ارد على بوست لاستاذى فشكول
لاء وكمان ايه اول ما اشطح انطح فى انى ارد على بوست لمصر
الله ما صلى على النبى
هكتفى بس بانى اتجراءت وعلقت
والبوست الا جاى هبقا اعلق عليه ذات نفسه
وربنا يسترها

بنت قلبى يقول...

بمى انا علقت اول مره واتجرات
فا دخلا اسلم على استاذى الكبير

الاحلام يقول...

كما تدين تدان ان الله يمهل ولا يهمل اخى العزيز وان شاء الله سنشم طعم الحريه جميعا رويدا رويدا
تحياتى الخالصه ابوداود

!!! عارفة ... مش عارف ليه يقول...

الحمد لله .. اللي حصل في مصر ده آية من آيات الله .. أه والله

وربنا أخدهم "أخذ عزيز مقتدر" سبحانه جلت قدرته

وربنا رزقه سوووووء الخاتمة

ربنا ينتقم منك يا ريس

مرآتي يقول...

أهو .. كده
ده الوقت اطمنت إني صرت من الحبايب بتاعون حضرتك .. ولا إيه ؟؟؟
على فكرة أنا مش فاهم إنت ضيعت كلمة المرور للمدونة الماضية بس .. ولا هي كل المدونة ضاعت ؟؟ علشان أنا لحد النهارده بدخل للمدونة القديمة بتاعتك وبشوفها ..
تحيتي ..

د.ريان يقول...

مساء الخير أخ فشكول

ويسعد أوقاتك بكل خير

كلمات رائعة وحقيقية

يارب احفظ لنا مصر واهلها

واتشرفت كثير بزيارتك اخي

دمتم بكل ود

القلم السكندري يقول...

السلام عليكم ورحمة الله وبركاته

و "مبارك" على المدونة الجديدة :)



عذب مصر ثلاثين عاماً، أذلّها ونكسها تحت نعال اليهود بحجة "الحكمة والسلام وضبط النفس".. أزهق من الأنفس مالا يعلمها إلا الله في سجونه ومعتقلاته..

ولا زالت بعضُ فئرانه تطل متبجحة من جحورها تحامي له حمية الجاهلية!ـ


ولا زال هناك من عبدة الفرعون من يجادل عنه ويعتذر له ويطلب توقيره واحترامه..

أقول لهم: أعطونا من دمائكم ودماء اهليكم بعدد ما سفك من دماءٍ على مر حكمه

وأعطونا من أعراضكم وأجسادكم نفتص منها بعدد ما عذّب وانتهك

فإن فعلتم، لعل الله يشفِ صدور قومٍ مؤمنين
وإن فعلتم، فلا شئ يثرجع ابناً مقتولا لأبيه او اباً لابنه.. ولا شئ يعوضُ أعماراص بذلها الالاف في معتقلات فرعون

أسال الله أن يمزقه ويمزق عبدته وملأه

وأن يعذبهم الله ويخزيهم ةيشف صدور قومٍ مؤمنين ويذهب غيظ قلوبهم

ريــــمــــاس يقول...

صباح الغاردينيا فشكول
مهما حدث ومهما أعترى مصر وشعبها
سـ يكللها الرحمن بحفظه ويأخذ لها حقها لتشرق سعادة وأمان بإذن المولى "
؛؛
؛
لروحك عبق الغاردينيا
كانت هنا
reemaas

مرآتي يقول...

أستاذ فشكوول ..
أنا امبارح كتبت بوستين بس إنت مشفتش غير بوست واحد بس .. والنهارد كمان كتبت اتنين .. لزوم نشوفك في البوست بتاع امبارح على سبيل القضاء .. والوستين بتوع اليوم على سبيل الأداء ..
تحيتي لك ..

ليس فقيرا من يحب يقول...

الاول مبرووووووك يا عمو على المدونه الجديده

حضرتك جبت اللى جوانا بالظبط يا عمو والله

وكأنك بتاخد الكلام من طرف لسانا تكتبه

انا باضم صوتى صوتك

احنا مش اسفين خالص ياريس

وعمرنا ماهنكون اسفين

وعيال الحرام اللى شايفينك ابوهم يشبعو بيك جاتهم ستين نيله

عامل ايه يا غالى ؟

اكسجين مصر يقول...

اهلا فشكوول فى اكسجين مصر

ستيتة حسب الله الحمش يقول...

واخيرا بعد ما أخدت تاكسي ليموزين وصلت لمدونة العم فشكول
إزاي صحة حضرتك
مبروك العتبة الجديدة اللي تتحط في الريدر حالا ومبروك لينا عودة الروح
بيقول لك اسبانيا فضلت بعد فرانكو تنتقل 5 سنين
والبرتغال 7 سنين
واحنا بننتقل أهو وعلى قد صحتنا في الفترة الإنتقالية
أما المجرم المخلوع وشلته الثملة
فاوالله ما ها ننسى
الشعب اتغير
كنت خايفة ينام بعد شهر
شهرين
خمسة
لكن الشعب عرف قوته وعرف انه كبر وبيخوف يا ابا ابنك عفرتو بلغ يابا وعليه مهما حصل ها يتحاكم مبارك
وعسى ربنا ان يولع فيه على السرير الفوشيا وهو في القفص بيلعب في مناخيره ويجعله لنا آية وعبرة

تحياتي

Carol يقول...

قلت اللي في نفسي :))
بس انا خلاص مش هممني الريس .. يروح في داهية ..
المهم البلد رايحة على فين يا مصر؟؟؟؟

citizen x يقول...

السلام عليكم ورحمة الله وبركاته

عمنا فشكوول
أنا كنت متابع لمدونة حضرتك في عام 2009 ؟
ولكن انقطعت عن التدوين لمدةعام وأكثر
وبالمصادفة لقيت مدونة حضرتك عند
شمس النهار

أتمني تكون حضرتك بخير وبصحة جيدة

تحياتي

Carmen يقول...

وقبل ماحنا نعرف ربنا سبحانه وتعالي عارف وشاهد وان عدو من الدنيا باخطائهم مش هيعدو من عذاب الاخرة :)
خالص احترامي لفكرك استاذي الفاضل

SAM يقول...

Dear friend. Once was homesick and I was happy with his reorno and visit. I hope in God that all is well with you and family. Thank you for the pleasant visit dexou me happy.

مرآتي يقول...

أستاذ فشكوووول ..
أنا وجهي أسود منك .ز علشان انا هعزبك تاني .. بس خلاص هي المرة الأخيرة

تحية طيبة مباركة ..
لأسباب فنية نقلت مدونتي "مرآتي" إلى مكان جديد اسمه "ظلالي البيضاء" والرابط هو :
http://mywhiteshadows.blogspot.com/
أرجو أن تسجل في المشاركين معي هناك لأني قيد إنجاز تعديلات فنية على مرآتي .. وكذلك لا تنسى تحذف مرآتي من المدونات اللي بتظهر جانب صفحتك وتضع بدلاً عنها "ظلالي البيضاء"
شكراً لك ومنتظر متابعاتك في ظلالي البيضاء بدل مرآتي ..

مرآتي يقول...

نصيحة اعمل زي ما عملت أنا علشان مش تضيع مدونتك من تاني :
1- اعمل حساب تاني ليك على غوعل غير الحساب الأساسي اللي عندك واللي بتسجل دخول منه لمدونتك الجديدة ..
2- ادخل لتصميم مدونتك من حسابك الأساسي وادخل لصفحة تبويب السماحات ..
3- هتلاقي مربع اسمه "مؤلفوا المدونة الالكترونية .. اضغط الزر الأزرق اللي اسمه "إضافة مؤلفين"
4- اكتب ميل الحساب الجديد اللي عملته وابعت له دعوة
5- اخرج من حسابك الأساسي وادخل بالحساب الجديد وروح للبريد بتاع الحساب الجديد واقبل الدعوة ..
6- ارجع سجل خروج من الحساب الجديد وادخل في الحساب الأساسي واخل تاني للسماحات وامنح الحساب الجديد صلاصيات الإدارة كاملة ..
كده صار عندك حسابين بتحكم كامل في المدونة ..ولو ضيعت حساب منهم يبقى لك حساب .. وممكن تكرر الخطوات لإضافة حساب ثالث ومنحه كامل الصلاحيات ..
وكده مش هتضيع المدونة .. وادعيلي ..
لا تنسى تحول لي على حسابي في بنك "حسنات " 100 حسنة أجرة التعليم ..هههههه

وجع البنفسج يقول...

لكل متجبر طاغية نهاية .. فدولة الظلم ساعة ودولة العدل إلى قيام الساعة .

ربنا قادر على الانتقام لدماء الشهداء عاجلا ام أجلا ..

هذه هي سنة الحياة .

المكتب المحلي لي حزب المبادرة بالمكنين يقول...

تحياتي لكم والى كل المصريين ...
نحن الشعب في القفص وهم خارجه

amiralcafe يقول...

تحياتي لكم والى كل المصريين ...
نحن الشعب في القفص وهم خارجه

ظلالي البيضاء يقول...

مرحباً أستاذ فشكوول ..
هذه زيارة خاصة لدعوتك إلى ظلالي البيضاء ..
وياترى إنت عملت بنصيحتي ولا لسه ؟؟
تحياتي لك

مرآتي يقول...

واااء .. واااء ... إهئ .. إهئ ...
أنا مش شايف ظلالي البيضاء هنا ..
ما احنا اتفقنا تحذف مرآتي من يمين صفحتك وتحط بدل منها ظلالي البيضاء ..
وأنا هاشرح لك السبب ..
مرآتي يمكن تعكس حاجات سودة في قلبي .. يبقى تسوّد صفحة المدونة بتاعتك ..
أما ظلالي فهي بيضاء هتبيض صفحتك أكتر ما هي بيضا..
تحيتي يا أستاااذ ..
بس أنا لسه هأولك فشكول ..
لازم ألاقي إسم يليق بمقامك ..

مستنّي اقتراحاتك في التسمية ..

rona ali يقول...

مساء الانوار :)

احنا كلنا عارفين ياريس كل طفل وكل نونو وكل راجل وكل بنت وكل ست وكل عجوز وكل عجوزة حتى انت عارف يا ريس

وكلنا مش آسفين لوجود حضرتك بصحتك الجامده دى في القفص يا ريس

وكلنا عارفين اخره دة ايه وصابرين بس هنطق ونقتلك بايدنا يا ريس

عجبتنى النقط الواضحه في كلام حضرتك بتجيب من الاخر يعنى :):)

تحياتى

وفاء بركات يقول...

السلام عليكم
سعيكم مشكور كلك واجب أستاذنا
ولا يريكم الله مكروها في عزيز لديكم
تقبل شكرى وتحياتي