الثلاثاء، 13 مارس، 2012

عبثيات فشكوول

النهارده الثلاثاء ربنا يجعله يوم ابيض على كل الناس.. قوم ايه :
قام فشكوول من النوم الساعه 10 صباحا وارتدى جلابيته البلدى بتاعة اخوه شلبى وأخذ العباءه على كتفه ووقف امام المرآه ليصلح من زينته ويصفف شعره يمينا برهه وشمالا برهه وفى النهايه يعملهم لخبطيشن عشان هما اربع شعرات لا شافعين ولا نافعين كل دا ليه : اقول لكم انا ليه : ...

عشان رايح يقبض المعاش لأول مره .. حمل معه شنطة واكياس لزوم الشياله وتخزين الفلوس وذهب فشكوول منتفخه اوداجه مشرأب الرأس فاتحا زراعيه للدنيا .. ثم ............. عاد مرة اخرى يجر ازيال الخزى والعال فاستقبلته زوجته منشرحة الصدر ضاحكه باسمه مستبشره وفتحت حجرها لتستقبل به حصيلة المعاش

الزوجه : هات يا خويا ربنا ما يحرمنا منك ولا من طلتك .. وفشكوول يضع فى حجر زوجته 825 جنيه ويقول لزوجته بصوت متهدج متبلج متشهلج وماحدش يسألنىمعنى الكلام دا ايه لانى مش اعرف : هما دول يا وليه وخلاص .. فتصرخ الزوجه مولوله غير مصدقه فيؤكد لها فشكوول  ان هذا هو كل ما فى الموضوع 

وبالصوت الحيانى .. يا لهووووى .. يا خلق هوووى .. ايه ده يا خويا .. يا ما جاب الغراب لامه , ولابس الجلابيه الكبيره وحاطط العبايه على كتفك ولا عمدة ابو طشت على دول؟ .. منتش مكسوف .. واتلم الجيران والشارع وكل خلق الله .. يا فضيحتك يا فشكوول

الوليه بقى بتقول : قوم يا خويا قوم .. قوم شوف لك حته تانيه .. الله يسهل لك .. ربنا يحننها عليك .. روح يا خويا اقعد جنب امك فى البلد .. 
فشكول .. يا وليه امى ماتت من زمان .. وماله يا خويا روح اقعد جنبها لحد ما تروح لها انت كمان .. انا عارفه انت ايه لزمتك فى الدنيا وقاعد فيها بتعمل ايه ؟
دا بيحصل فى كتير من بيوت مصر .. ليييه : لان الدوله المصريه دوله بتاكل عيالها .. دوله اصيله فى التاريخ قليلة الاصل فى التعامل مع اولادها .. الدوله المصريه دولة الرمز .. المرتب رمزى .. مين رمزى ده ؟ .. المعاش رمزى .. دوله استقطاعيه بتستقطع عيالها

خد القرشين دول حاجه رمزيه وروح بقى كمل الشهر بتاعك براحتك وعيش على قدك سواء كان مرتب او معاش والمعاش على قد اللى استقطع منك .. طب يا دوله يا مصريه الله يخليكى ويطرح البركه فيكى انت بابا وانت ماما وانت انور وجدى وما حدش قالك لا ما تستقطعين .. اشمعنى يا ختى عامله زى المنشار وبتلهفى من المرتبات ضرائب شيئ وشويات ولا حد بيفتح بقه  .. اشمعنى يا ختى كل يوم اعلانات فى التليفزيون وكل وسائل الاعلام 

اتبرع لصالح مستشفى 57357 
ابترع لمستشفى السرطان بطنطا
اتبرع لحساب 2011/1/25 عشان تساعد فى اقتصاد مصر
كله اتبرع .. ما فيش حاجه اسمها خد خالص

أمال انت يا دوله يا مصريه يا عريقه فى التاريخ بتعملى ايه ؟ .. فيكى ايه يا مصر .. ليه بتاكلى عيالك .. ليه بتعذبى ولادك .. ليه ببيتخرجوا من الجامعات وترميهم على الارصفه .. ليه اللى بيتكلم فيكى ويطلب حقه بتقتليه ... ليه وليه وليه ؟؟؟؟؟؟؟؟
اصل اللى بيشرب من نيلك يا مصر بيرجع لك تانى .. على ايه يا خويا .. دا النيل كله بلهارسيا وبلاوى مسيحه

وعبد الوهاب بيغنى .. النيل نجاشى .. حليوه اسمر .. امال لو كان اشقر ولا ابيض كنا عملنا ايه؟

ما تقولش ايه ادتنا مصر ...... لأ قول حندى ايه لمصر لحد امتى؟ ..ثم ان مصر خلصت علينا خالص ولا حيلتنا حاجه نديها ولا بتدينا
يا حبايب مصر ... حبايب قال والله ما شفنا منها حاجه حلوه خالص
دى مصر بتمص دمنا .. بتستقطعنا .. بتحرق قلبنا 

الدنيا اخذ وعطاء وليست عطاء فقط ولا من جانب واحد .. الدنيا خد وهات
حتى تعرف مصر ان لنا حقوقا عليها .. لا بد ان نحاسبها حسابا الملكين حتى تقر وتعترف اننا أبنائها لنا عليها حق الحب وحق الدلال .. بس ما علهش .. خلينا تخليها تحبنا الاول وبعدين حييجى الدلال بعد كدا .

كتير علينا

هناك 17 تعليقًا:

ستيتة يقول...

أه وأه وأه وإيه
بيقولوا لك يا فشكول بيه إن مصر اللي هي أمي تخصص خنصرة من الجيوب بعد القبض
زي آدم ما كان بيقول لحورية في الهمجي لحقتي تأييفي الجاكتة يا حورية
بيستقطعوا منا معاشات ويسرقوها ويسرقوا ريعها ومصايب سودة في التأمينات وكله على عينك يا تاجر
وعلى المتضرر اللجوء لألسكا
لنا الله يا فشكول بيه

ياسمين يقول...

حاميها حراميها..!
العيب مش ف مصر...

محمد الجرايحى يقول...

لاحول ولاقوة إلا بالله
معلش أستاذنا كله فى سبيل الأوطان هى دى الحكومة قبل الثورة بعد الثورة لافائدة

;كارولين فاروق يقول...

اصبح الامل بعيد فتبدد الامل باليأس
العيب فينا ومصر هي ابنائها

haneen nidal يقول...

ما تقول اديتنا ايه مصر قول حندي ايه لمصر يا لهوي يا خواتي :(

كان الله في العون استاذنا و يلا هاي الدنيا الي اتكتبت علينا و ان الله مع الصابرين :d

منجي باكير يقول...

تقديري لرصد حيّ لواقع مرير ..

منجي / الزمن الجميل

reemaas يقول...

فكرتنى بوالدتنى يوم ماقبضت المعاش كانت مصدومة صدمة السنين

انا اللى نفسى افهمه بقى يا استاذ فشكول ونفسى حد يفهمهولى ليييييييه لما الاولاد يرخوا من المعاش نصيبهم ينقطع منه ليه مابيخدهوش اللى فاضل استحقاقه سارى وهو الام ليييييييييه ياخده فلوسنا مش فاهمة

هبة فاروق يقول...

يا خساره تعب السنين وضياع العمر فى العمل الحكومى
هى دى مصر وعمر حالها ما حيتعدل كلمه وبقولها دايما مفيش فايده وياخساره الثوره يا جدعان

وصف الاحساس يقول...

يا عمو فشكول .. كتر خيرها ال لامانا في وظايف في الاف غيرنا مش لاقيين ... انت زعلان من معاش 800 جنيه في غيرك بياخد 500 بعد 25 سنه شغل واكتر من كده .. مصر ال تقصدها دي ماتت من زماااان مصر ال موجوده علي الموضه ا لا مود وبعدين عايزين تشتغلو وتاخدو معاش كمان ومش عاجب بلد ما يعجبهاش العجب صحيح
ال احنا فيه ده نستاهله ونستاهل اكتر منه لاننا اول ما بنشم نفسنا بنيجي علي بعض
الاخ بياخد حق اخوه والام بتبيع عيالها
احنا ال سيبنا نفسنا نعيش من غير كرامه من غير ما نتعلم نقول لا من غير ما نطالب بحقنا والله احنا نستاهل يركبونا ويدلدلو رجليهم وفي الاخر يرمولنا 10 % علاوه اجتماعه بلا خيبه
بس سيبك انت عاجبتني التوافقي ال علي راس المدونه دي

ريـــمـــاس يقول...

صباح الغاردينيا فشكول
يمكن أنا سعودية وحتقولي ياريماس الي ايده في الميه مش زي الي ايديه في النار بس غصب عني مش حقدر اقول غير بحبها وأموت فيها :)
ويارب
يارب
يارب
يبقى حالها أحسن "
؛؛
؛
لروحك عبق الغاردينيا
كانت هنا
reemaas

rona ali يقول...

بس ياعمو متفكرنيش
باللي بيحصل بابا كان كدة
وماما جايه بتجري اهى شايفها

كل واحده تطلع من زمايلها تجر اذيال الوكسه اللى هما فيها
وموضوع الخصم من المرتب 9 في الميه للى اشتركوا في الصندوق دة يعنى
علشان يدوك معاش الاموال دى اتسرقت وبيخصموا دلوقتى 10 في الميه علشان يلحقوا يدوا الناس اللى طلعت بقالها كام سنه ومخدتش حاجه
ولكى الله يامصر

Noha Saleh يقول...

مفيش حاجة اتغيرت فى البلد للاسف
مشكلة المعاشات دى من قديم الازل
معلش ربنا يصلح الاحوال

Noha Saleh يقول...

كنت عاوزة اعرف رأى حضرتك فى الموضوع المنشور عندى بالمدونة

شمس النهار يقول...

المفروض ان المعاشات دي اغني وزارة اغني من البترول

نيللى يقول...

معلش أستادنا الكبير..ماضاقت إلا مافرجت..مين عارف يكره في أيه؟
ربنا يباركلك في معاشك ويفيض كمان!

أصل الفلوس لما ربنا بيبارك فيها بتلاقي الدنيا مشيت

وربنا يحفظك ويحفظك أهلك يارب

( حياتى ) يقول...

معك حق استاذنا من حقنا نعيش
زى البنى آدمين لكن طول ما حاميها حراميها مش هنعرف ، وطول ما اكلنا ولقمته من جيب غيرنا مش هنعرف، وطول محنا دولة مستهلكة مش منتجة مش هنعرف، الحق يغتصب بالقوة لايهدى لان اللى فى اديهم الحق والملك علت قلوبهم الرين والزيف وحب الشهوات ، هم عملين دلوقتى زى الاسد الجريح اللى بيحاول يهجم بكل شراسة قبل انفاسه الاخيرة لكن لاغالب الا الحق

عذراً للإطالة
مودتى
زهرة

khédidja Bénadel يقول...

يامساء الغنج والدلال يا فشكوول
أم العيال بتطردك من بيتك ، اخس عليها الولية اللي بتعملو ده
وبتقول ياما جاب الغراب لأمه يا عينيييييي عليها بردة هاهاهاها
ومصر دي بالذات حبيبتي فيها الحضارة والمجد والتاريخ والفن وكل كلووو
بس متسألنيش مجد مين ؟ ههه
النيل جميل وركبة وحدة في مراكبه بالليل تنسي الحزين أصل حزنه
ازاي يا راجل تقول بتمص دمنا هي مصر أرض الأنبياء والأتقياء وكرمها ربي عز وجل
أنها مذكورة بالقرآن ...ودي من خلق المبدع الواحد الله أما اللي يمص دمك هو صنيع
البني آدم الجيعان المهووس بحب المال وناسي أنو فيه بكرا وقفة قدام المنان الذي لا يغفل ولاينام ، بقولك ايه سلم أمرك لله وأمضي وان شاء الله خير ...ويارب النيل يبقى
سيل زلال يروي العطشان ويمسح دمعة الأيتام ويرفع الظلم وين ما سار ..
ومرسي بعون الله معه الحق وان شاء الله معه ترتاح
قوووول آميييييين ...يلا مع السلامة .